Студентите кои протестираа вчера за да се укине ектерното тестирање на факултетите сакаат и институционално да ја продолжат борбата. Бараат средби со надлежните институции каде што ќе можат да ги образложат нивните ставови и проблеми. Сè уште не добиле никаков одговор од министерот за образование и наука, Абдилаќим Адеми, на писмото што му го испратија вчера.
Министерот вели дека одговор не може да даде затоа што во писмото нема ни име ни адреса.
– Ќе имаме состанок на кој ќе се утврдуваат следните чекори. Ние сакаме борбата да ја продолжие на институционално ниво. Бараме средба со министерот за образование и наука, со претставници на СПУКМ, но и со претседателот Ѓорге Иванов, бидејќи сметаме дека неговиот став е многу важен затоа што тој е универзитетски професор. Во наредниот период сакаме и да организираме дебата на студентско ниво за да можеме да ги утврдиме сите проблеми и со примери да се обратиме до институциите – вели Стефан Видиков од „Студентски пленум“.
Министерот за образование и наука, Абдилаќим Адеми, рече дека го добил писмото од студентите и дека смета дека зад протестот стојат политички партии.
– Примив писмо во кое нема ништо конкретно за екстерното оценување. Има барање за оставка на министер, а се знае дека оставка секогаш бараат политички партии, а не студенти. Подготвив одговор на писмото но, за жал, не можам да го доставам зашто во писмото нема ни име ни адреса. Деновиве очекувам да добијам име на организаторот и адреса за да му пратам одговор, а ако не добијам, тогаш јавно ќе одговорам преку средствата за јавно информирање – изјави Адеми.
Тој лично е повеќе наклонет да има екстерно тестирање, но рече дека таа одлука не зависи само од него.
– Пред сè зависи од Одборот за акредитација кој треба понатаму да ги спроведува сите активности, па универзитетите, студентите, политики на Владата од аспект на образованието. Ако се одлучиме да има, тоа мора да биде без да се нарушува автономијата на универзитетите, без да се загрози Болоњскиот процес и без да има дополнителен товар и за универзитетите и за студентите – изјави Адеми.
Адеми додаде дека сè уште не е одлучена формата на оценување, а кога ќе се одлучи, тоа ќе биде транспарентно споделено со јавноста. Тој рече дека е отворен да дискутира и да ги прими не само легитимните претставници, туку и сите заинтересирани.
С.А.
