Министерот за образование и наука Абдилаќим Адеми на Глобалниот образовен самит кој викендов се одржува во Истанбул во своето излагање истакна дека е неминовно образованието постојано да се модернизира и реформира.
– Денес можеби побрзо од кога и да е, потребно да се воведуваат новини во образованието. За да бидеме во тек со развојот на научната мисла, како Министерството за образование и наука и како Владата на Република Македонија, во континуитет работиме на осовременување на образованието и тоа во сите сфери, во основното, средното и високото образование. Воведените реформи во образовниот систем во нашата земја одговараат на потребите на пазарот на трудот, бидејќи како и на секоја држава и нам ни е потребен, образован и стручен кадар – рече Адеми.
Министерот пред присутните зборувал за дел од реформите кои се направени во македонското образование.
– Сакам да потенцирам дека во тек е изготвувањето на нова „Стратегија за образование 2016 – 2020“, преку која ќе се зајакнат сите капацитети во воспитно образовната политика на нашата земја. Квалитетното образование овозможува градење на општество базирано на знаење и придонесува целиот овој систем да одговара на потребите на учениците, училиштето, на локалната заедница, бизнис секторот, на целото општествено опкружување – рече Адеми.
Министерот осврнувајќи се на реформите во основното образование, потенцирал дека основците учат по Кембриџ програмите.
– Една најголемите реформи во основното образование е воведувањето на наставни програми подготвени од Меѓународниот центар за наставни програми – Кембриџ, најголемиот светски провајдер на меѓународни образовни програми и квалификации за деца на возраст од пет до 19 години. Морам да нагласам дека Република Македонија е прва земја во регионот која воведе наставни програми по Кембриџ. Прво беа воведено од прво до трето одделение, потоа од четврто до шесто, од наредната година математика и предметите од областа на природните науки ќе се воведат во седмо, осмо и деветто одделение. Следен чекор е воведување на светски признатите наставни програми од областа на природните науки во средното образование“, рече Адеми.
Средното образование во Република Македонија е задолжително, рекол Адеми и додал дека и во оваа сфера се воведуваат новини, со цел средното образование да биде европски усогласено и прилагодено на пазарот на труд.
