Главното огледало на телескопот Џејмс Веб дојде во судир со мал фрагмент од карпа што остави забележлив ефект врз собраните податоци, јави Би-би-си.
Штетата беше предизвикана од страна на микрометероидот голем колку честичка прашина кој удри во сегментот познат како C3 од 18 други сегменти на примарното огледало. Сепак, судирот нема да ја наруши планираната мисија и најсофистицираниот телескоп во историјата ќе ни ги претстави најновите слики од вселената во јули.
„Кон крајот на мај, Веб беше пресретнат од микрометероид што удри во примарниот сегмент на огледалото. Не грижете се, и покрај тоа Веб сѐ уште работи на ниво што ги надминува сите барања на мисијата. Првите слики што ќе ја „расплетат“ вселената ги очекуваме на 12 јули“, информираа од НАСА на нивниот Твитер профил.
In late May, Webb sustained a dust-sized micrometeroid impact to a primary mirror segment. Not to worry: Webb is still performing at a level that exceeds all mission requirements. Our first images will #UnfoldTheUniverse on July 12: https://t.co/9jp0uq7ytS pic.twitter.com/VKkSp16yrg
— NASA Webb Telescope (@NASAWebb) June 8, 2022
Научниците ќе го приспособат позиционирањето на засегнатиот сегмент на огледалото за да отстранат дел од изобличувањето, но не ќе можат да го отстранат целото.
Џејмс Веб е најнапредната опсерваториска направа што некогаш била испратена во вселената. На него работеше голем тим научници од НАСА, Европската вселенска агенција и Канадската агенција. Веб функционира на температура од – 230 Целзиусови степени и треба да ни ги претстави досега најпрецизните слики од вселената што е историски чекор кон напредокот на човекот за истражување и откривање на универзумот.