Писателот, поет и професор од Корча, Република Албанија, Арјан Калчо, деновиве учествуваше на Меѓународна поетска средба во Охрид, организирана од КИЦ „Култура 365“.
На средбата прочита три свои песни од објавена збирка на албански јазик и речиси низ трите се препознаваше Охрид, со неговите сокаци, старините, пристаништето… Во еден стих од негова песна, директно пее дека „пријателствата се мостови, кои се градат“. За репортерката на „Охрид прес“, Калчо открива дека вообичаено од Охрид, неминовно добива инспирација за да напише песна.
– Охрид е убаво место. Мило ми е што имам можност да го посетам. Во текот на моите средби овде во Охрид, напишав повеќе песни за градот. Соработката на кој било начин со различни автори од различни места е доказ дека уметниците шират љубов, ги сакаат луѓето – вели Калчо.
