Од бескаматната кредитна линија со грант компонента ,,Ковид 3”, која се реализира со финансиска поддршка од Европската Унија преку активноста ЕУзаОтпорност од ИПА програмата, заклучно со 5-ти март се исплатени 23,5 милиони евра за 2.053 корисници кои ги исполниле условите од јавниот повик. Од Развојната банка на Северна Македонија информираат дека заклучно со вчерашниот ден се исплатени 96,7 отсто од корисниците на кои им се одобрени кредитните барања за оваа линија.
Досега, одобрени се вкупно 2.122 кредитни барања на вкупен износ од 24,3 милиони евра. Овие микро и мали трговски друштва, трговци-поединци и занаетчии имаат вкупно 16.009 вработени.
Според структурата, 1.172 кредитни барања се од мали компании, додека 792 барања се од микро компании. Вкупно 116 кредитни барања се од трговци-поединци, додека 42 кредитни барања се од занаетчии.
Најголем дел од одобрените 2.122 кредитни барања доаѓаат од Скопскиот регион, и тоа 31 отсто, а по него следат Полошкиот регион со 14 отсто и Југозападниот и Југоисточниот регион со по 12 отсто. Од Источниот и Пелагонискиот регион се по 10 отсто од одобрените кредитни барања, додека од Вардарскиот и Североисточниот регион се 5 отсто од одобрените кредитни барања.
„Кредитните барања се обработуваат хронолошки, според времето на пристигнување, согласно Јавниот повик и информациите наведени во него“, информираат од Развојната банка на Северна Македонија.
Тие ќе продолжат со процесирањето на кредитните барања сè до утврдување на исцрпеност на расположливиот буџет на мерката кој изнесува 31 милиони евра.