Во Атина денеска почна 24-часовниот штрајк на вработените во јавното претпријатие за шински сообраќај, кое бара укинување на законот кој, според нив, би отворил врата за приватизација на компанијата, јавуваат грчките медиуми.
Во соопштението на синдикатот на вработените во претпријатието се наведува дека новиот закон, со кој се дозволува комерцијална експлоатација на станиците и на објектот на компанијата, би бил „тројански коњ“ и би отворил врата за приватизација на компанијата.
Вработените, исто така, сметаат дека промената на законот значително ќе ги намали приходите на претпријатието и ќе му нанесе огромна штета од одземање на легалниот приход, со што се поткопува неговиот статус на јавно претпријатие.
Метрото, трамвајот и меѓуградските возови нема да работат до утре, а синдикатот најави штрајк и за 1 и за 4 март.
