Опозицискиот СДСМ порачува дека буџетот за 2017 година што го одобрија кадрите на Никола Груевски во Владата, доколку биде усвоен од мнозинството во Собранието, ќе претрпи темелна ревизија и ќе биде проектиран исклучиво според потребите на граѓаните на Република Македонија.
„Нагласуваме дека владата што сега функционира е техничка и е формирана само за организирање и за спроведување на предвремените парламентарни избори. Оваа влада не смее да носи сериозни акти каков што е буџетот за 2017 година тежок 3 милијарди евра“, пишува во соопштението на СДСМ.
Од партијата велат дека СДСМ нема да дозволи исплатата на сите тековни трошоци, плати, пензии, субвенции, социјални трансфери, на ниеден начин да биде загрозена.
