Француски официјални лица соопштија дека полицијата уапсила уште две лица во врска со нападот во туристичкиот град Ница, во кој загинаа најмалку 84 лица, а беа повредени околу 300 други.
Еден маж и една жена беа уапсени денеска во утринските часови во Ница.
Пет други лица веќе се во притвор, вклучувајќи ја и жената на возачот на камионот, 31-годишниот Мохамед Булел.
Светските медиуми пишуваат дека Булел двапати го обиколил шеталиштето во Ница со изнајмен камион пред на 14 јули да влета во масата луѓе и да убие 84 лица.
Неименуван извор близок до истрагата изјавил дека полицијата досега испрашала стотина луѓе и додаде дека некои од испитаниците навеле дека Булел покажувал знак на религиозност, додека дел од неговите пријатели и членови на семејството претходно изјавија дека напаѓачот пиел, пушел и никогаш не одел во џамија.
