!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

„Стрежево“ треба да му плати милион евра на ЗК „Пелагонија“ за неиспорачана вода


Битола, 12 април, 2017 - 10:00 (META) 

Еден милион евра е сумата што јавното претпријатие „Стрежево“ – Битола треба да му ја исплати на земјоделскиот комбинат „Пелагонија“ од Битола, заради договорена, а неиспорачана вода за наводнување на земјоделските парцели на комбинатот во летото 2015 година, кога хидросистемот имаше хаварија на цевководот. Ваква пресуда донесе Основниот суд во Битола по тужбата на „Пелагонија“ против „Стрежево“ за надомест на штета.

За предметот одлучуваше судијата Злата Маџароска, а за оваа пресуда ќе треба да се изјасни и Апелацискиот суд во Битола. ЈП „Стрежево“ поднело претставка до надлежниот судски совет со барање да се утврди пристрасност кај судијата Маџароска.

Во пресудата стои дека во 2015 година двете страни склучиле договор за наводнување на земјоделските површини на комбинатот, насадени претежно со хибридна пченка, но дека поради дефект на главниот доводен канал на системот на „Стрежево“, во одредени периоди имало прекини во наводнувањето или, пак, воопшто немало вода до засеаните ниви. Тоа предизвикало намалени приноси на парцелите на комбинатот.

Според вештачењето, штетата изнесува 61.378.963 денари или повеќе од еден милион евра. Комбинатот пред судот побарал отштета од сто милиони денари, односно околу 1,6 милиони евра.

Сослушаните сведоци кажале дека исклучувањето на целиот систем на ЈП „Стрежево“ се случило на 27 јули 2015 година заради активно свлечиште, по што водата во системот за наводнување била пуштена дури на 6 август.

Она што е интересно, а стои во пресудата, е што ЈП „Стрежево“ уште во март 2015 година, значи пред хаваријата, имало известување од страна на Владата за две свлечишта, долж каналската мрежа, настанати во февруари истата година.

Вработени во ЈП „Стрежево“ неофицијално пресметуваат дека ако Апелација ја потврди пресудата, тоа би се одразило значително врз ликвидноста на претпријатието. Штета од еден милион евра велат дека е рамна на седум плати на 250 вработените во „Стрежево“.
Директорот на ЈП „Стрежево“, Марјан Ѓероски, вели дека овој спор ќе потрае и веројатно ќе заврши на Врховен суд.

– Пресудата е неправедна и е крајно пристрасна. При нејзиното носење не се земени предвид фактите и затоа судиите и правниците што ги консултиравме ја квалификуваат и со поостри зборови и убедени сме дека нема да помине на повисокиот суд. Во меѓусебниот договор уредени се ситуациите за неиспорака на вода заради свлечишта и други непогоди, каде корисникот нема право на надомест. Против судијата од Основниот суд ќе поведовме постапка пред надлежните органи- стои во писмениот одговор од директорот Ѓероски.

Коментар за пресудата писмено побаравме и од ЗК „Пелагонија“, но добивме усно одговор дека не коментираат судски одлуки.

Адвокат во пензија од Битола, вели дека досега во неговата практика не се сеќава Основниот суд во Битола да изрекува отштети во толку голем износ, но и дека во принцип не е толку важна висината на износот, колку основата врз која е пресудено.

За потсетување, во летото 2015 година свлечиште во непосредна близина на битолското село Драгарино целосно урна дел од главниот цевковод кој со вода од акумулацијата „Стрежево“ ги снабдува ЈП „Водовод“, земјоделците, индустрискиот дел на градот и РЕК – Битола , како најголем корисник.


Во некои тетовски населби нема капка вода, таму каде што ја има е заматена


Тетово, 24 март, 2017 - 14:44 (META) 

Граѓаните што живеат во горниот дел на Тетово, втор ден се соочуваат со целодневни рестрикции во водоснабдувањето. Во другиот дел на градот вода има по неколку часа, но таа според последните анализи на Центарот за јавно здравје Тетово, е заматена.

– Немаме капка вода цел ден. Ова е ужас, ама сме се навикнале. Купуваме вода, полниме резерви во буриња – вели една жителка на Тетово, која живее во горниот дел на градот.

Од Јавното комунално претпријатие Тетово велат дека рестрикции на вода за пиење има поради намалениот водостој на изворите, од кои Тетово се снабдува со вода за пиење, но и поради постојаните дефекти на градската водоводна мрежа, која е стара и дотраена.

Оттаму очекуваат деновиве да се стабилизира водоснабдувањето во градот, со зголемувањето на количествата вода за пиење вообичаена за пролетниот период. Заматеноста на водата, според претпријатието, се појавила поради градежни активности околу филтер-станицата од новиот тетовски водовод.

– Се вршеа некои градежни активности на филтер-станицата, односно таа се поврзуваше со една од хидроцентралите на новиот тетовски водовод, кој очекуваме да се пушти во употреба во догледно време, со што конечно ќе се реши дводеценискиот проблем со водоснабдувањето во градот – изјави Борче Бојовски од Јавното комунално претпријатие Тетово.

Изградбата на новиот тетовски водовод никако да заврши. Локалната власт неколкупати вети дека водоводот ќе биде готов во 2016 година, но реализацијата на овој проект стар две децении, сè уште тапка во место.


На Меѓународниот ден на водите, „Арсена“ потсети на загадената вода во Гевгелија


Гевгелија, 22 март, 2017 - 18:09 (META) 

Граѓанската иницијатива „Арсена“ подели пакувања чиста вода на штанд поставен на градското шеталиште во центарот на Гевгелија, по повод Меѓународниот ден на водите.

Мотото на оваа акција беше „Здрава вода за здрав живот“, а целта беше да се актуелизира долгогодишниот проблем на гевгеличани со потребата од чиста вода за пиење, поради присуството на енормно високи концентрации на отровниот металоид арсен во водите од градскиот водовод.

„Ова што се случува со водата во Гевгелија е трагично и неодговорно. Сите сакаме чиста вода и сите заслужуваме да ја имаме дома како корисници на јавниот водоводен систем. Но, работите се надвор од секаква контрола на локалните власти. Изгледа, сиве овие години, поважан им беше мирниот мандат и бенефициите од мандатот, наместо задоволување на потребите на граѓаните за чиста вода“, изјавија од „Арсена“.

Од оваа иницијатива најавуваат формирање на правен тим кој ќе се занимава со правните консеквенци на одговорните за долгогодишното труење на гевгеличани со арсенот во гевгелиската вода.


Жители на Волковија протестираа поради загадувањето на селските извори


Тетово, 26 февруари, 2017 - 16:35 (META) 

Со мирен протест, жителите од тетовското село Волковија го искажаа своето незадоволство поради, како што рекоа, загадувањето на селските извори од кои се снабдуваат со вода за пиење.

Тие посочијa дека изворите се загадуваат поради градежни работи кои ги врши приватна фирма, ангажирана за изградба на воспитно-поправен дом, кој се гради во близина на изворите и во атарот на нивното село.

Според нив, фирмата врши нестручни ископи околу изворите за водоводниот систем на домот да се приклучи и да се снабдува со вода за пиење од селските извори.

– Деновиве почнаа да копаат околу изворите. Отворија пат и, како што гледате, тој пат се спушти до самите извори. Земјениот материјал од дупките кои ги ископаа, се спушта директно во изворите кои веќе се заматени, а и вреќи од цемент има тука. Ова од чист селски извор стана депонија – вели Русе Михајловски, жител на Волковија.

Жителите велат дека случајот го пријавиле во полиција и бараат негово целосно расветлување. Тие не се согласуваат водоводниот систем од воспитно-поправниот дом да се приклучи на селските извори, затоа што ќе се доведе во прашање снабдувањето со вода за пиење за селото.

Веќе неколку години мештаните од Волковија протестираат поради изградбата домот, кој, според нив, ќе доведе до појава на криминални дејства во нивното село, со оглед на тоа каква категорија на луѓе треба да престојуваат во оваа установа.

Домот сè уште се гради, а според најавите на надлежните, требаше да профункционира минатата година.


Се повлече водата зад браната во САД, се очекуваат нови поројни дождови


Вашингтон, 14 февруари, 2017 - 14:17 (META) 

Водата зад најголемата брана во САД, на северот на Калифорнија се повлекла, јавуваат американските медиуми.

Инженерите брзо ја исфрлаат водата од преполниот резервоар и го зајакнуваат помошниот преливник на браната на езерото Оровил, пред новиот бран поројни дождови кои се најавени за утре.

Властите соопштија дека ја спречиле непосредната опасност од катастрофално пукање на браната, кое би можела да ги поплави околните места, а нивото на водата да достигне висина и до трикатна куќа.


Нивото на Охридско Езеро се врати на дозволениот минимум


Охрид, 13 февруари, 2017 - 10:35 (META) 

Мобилизацијата на еколошките асоцијации и нивните протести вродија со плод, така што нивото на водата во Охридското Езеро се врати на дозволениот минимум.

Спопред последните мерења што ги врши УХМР, нивото е во граница на дозволениот минимум.

По затворањето на испустот кај вливот на реката Црн Дрим, од пред десетина дена, нивото на водата во езерото е пораснато за четири сантиметри.

Од ЕЛЕМ исто така изјавија дека „прилагодување на испустот на вода од Охридското езеро во Црн Дрим на режим на биолошки минимум, ќе се применува на неодредено време се до зголемувањето на водостојот на Охридското Езеро.


Аларм од албанска страна: Водата во Охридско Езеро е повлечена за околу 40 метри


Охрид, 8 февруари, 2017 - 17:11 (META) 

Нивото на водата во Охридско Езеро неколку недели е под минималната кота, односно 23 сантиметри под нивото дозволено од страна на УНЕСКО, предупредува експертот по животна средина од Поградец и порашен претставник на Албанија во заедничкиот Билатерален комитет за заштита на Охридското Езеро, Аријан Мероли.

Како што пренесува порталот „Охрид прес“, во најниските крајбрежни подрачја, на потегот од градските плажи во Поградец до Тушемиште, водата е повлечена за околу 40 метри, а во длабочина за околу еден и пол метар.

– Истиот феномен е забележан од албанска и од македонската страна. Одговорните органи на Македонија наведуваат дека главна причина за ваквото ниско ниво на езерото е производството на електрична енергија од страна на ЕЛЕМ, што од друга страна е голема опасност за живиот свет на езерото – алармира Мероли.

Тој додава деа ова е во целосна одговорност на македонските власти, бидејќи единствениот пат за испуштање на водата од Охридското Езеро е реката Црн Дрим.

– Државната компанија за производство на електрична енергија ЕЛЕМ управува со браните за испуштање и за запирање на водите од Охридското Езеро. За жал, во текот на јануари, медиумите објавија дека се случил голем дефект во една од најголемите термоцентрали во Македонија, која е главен производител на електрична енергија. Мое мислење е дека тоа е главната причина поради која ЕЛЕМ одлучи овој недостиг на производена електрична енергија од страна термоцентралите да го компензира со користењето на езерските води, што од друга страна се коси со сите меѓународни прописи, со статусот на Охридското Езеро, но, најважно од сè, е спротивно на сите договори што ги има потпишано Македонија – истакна Мероли.

Тој додаде дека ситуацијата е слична секоја година, но не се памети кога последен пат се случило во ваков размер.


ЕЛЕМ: Нема неконтролирано испуштање вода од Охридско Езеро


Скопје, 6 февруари, 2017 - 15:51 (META) 

Од АД ЕЛЕМ велат дека е „лага дека водите од Охридско Езеро биле прекумерно искористувани за производство на електрична енергија“, како реакција на соопштението на СДСМ.

– Зголеменото производство во декември е според планот за работа за тој месец, како и поради натпросечните дотеци во ноември, а, пак, намаленото производство за јануари се базира врз планот  во енергетскиот биланс за тој период и согласно потпросечните дотеци во декември минатата година – велат од ЕЛЕМ.

Оттаму истакнуваат дека го прилагодуваат испустот на вода од Охридско Езеро во Црн Дрим според котата на езерото, а во согласност со референтните податоци на УХМР, како и според страничните дотеци во сливот на ХЕЦ „Глобочица“.


Еко-свест бара нови опции во енергетскиот систем и одржлив развој на Охрид


Охрид, 4 февруари, 2017 - 13:02 (META) 

Центарот за истражување и информирање на животната средина, „Еко-свест“, препорачува разгледување на нови опции за развој на електроенергетскиот систем на Македонија кои би обезбедиле поголема сигурност во снабдувањето и би придонеле кон намалување на енормното аерозагадување.

– Во услови кога има енормно загадување на воздухот во повеќе градови низ Македонија, Електрани на Македонија (ЕЛЕМ) најавува дури четири нови термоелектрани на јаглен кои значително ќе придонесат кон аерозагадувањето во делови од земјата кои во моментов не се оптоварен со загадување од термоелектрани- велат во „Еко свест“.

Од таму барат надлежните да направат истражувања за искористување на обновнливите потенцијали, особено потенцијалите за сончева и ветерна енергија.

Еко свест уште еднаш потсетува на потребата од изнаоѓање решенија за одржлив развој на Охрид, кога е во прашање енормното испуштање на вода од Охридско Езеро.

Од АД ЕЛЕМ одговорија дека немало неконтролирано испуштање на вода.

– АД Електрани на Македонија во насока на целосно информирање на јавноста уште еднаш повторува дека го прилагодува испустот на вода од Охридско Езеро во Црн Дрим според котата на езерото во согласност со референтните податоци на УХМР, како и според страничните дотеци во сливот на ХЕЦ Глобочица – појаснуваат од ЕЛЕМ.


ЕЛЕМ: Нема неконтролирано испуштање на вода од Охридско Езеро


Скопје, 2 февруари, 2017 - 18:45 (META) 

ЕЛЕМ го прилагодува испустот на вода од Охридско Езеро во Црн Дрим според котата на езерото, во согласност со податоците на УХМР, како и според страничните дотеци во сливот на ХЕЦ Глобочица, информираат од компанијата, а по повод информациите дека ЕЛЕМ ја користи водата од Дрим за пороизводство на енергија, со што Охридско Езеро има низок водостој.

– Следејќи ги хидролошките состојби, АД ЕЛЕМ во изминатиот период го редуцира, во целост го прилагоди и го оптимизира производството на електрична енергија од хидроцентралите по течението на Црн Дрим во согласност со дотеците и со хидролошката состојба – велат од ЕЛЕМ.

Оттаму очекуваат зголемување на водостојот на Охридското Езеро во наредниот период, особено со топењето на снегот на околните планини, како и поради очекуваните врнежи од дожд и од снег што директно ќе придонесат за зголемување на дотеците во езерото.