„Твитер“ за пресудата за Талевска: Република Условна Македонија…


Скопје, 19 февруари, 2018 - 15:53 (META) 

Откако Кривичниот суд денеска и одреди условна казна од две години затвор на новинарката Ивона Талевска, доколку во следните четири години не го повтори или стори друго кривично дело, на социјалните мрежи има многу коментари на негодување за казната која ја доби Талевска за затајување данок во случајот „Тифани“ на СЈО.

Дел од корисниците гневни велат дека нема да плаќаат веќе данок, други сметаат дека таа требала да добие ефективна казна затвор.


Анализа: Градоначаниците не ги користат социјалните мрежи за да ги слушнат граѓаните


Скопје, 17 декември, 2017 - 13:45 (META) 

Осумдесет од вкупно 81 градоначалник ја користат социјалната мрежа „Фејсбук“ во својата работа, покажа анализата направена од тим специјалисти за социјални медиуми, во периодот помеѓу 04 и 15 декември 2017 година.

Втор на листата на „омилени“ социјални медиуми кои ги користат градоначалниците е „Инстаграм“. Анализата покажува дека 21 градоначалник го користат „Инстаграм“, а само пет од 81 градоначалник го користи „Твитер“.

Сепак, специјалистот за нови медиуми и односи со јавност, Бојан Кордалов, вели дека повеќето од градоначалниците еднонасочно ги користат социјалните медиуми, односно само за промоција на нивната работа, но не и за да контактираат и да ги слушнат проблемите и идеите на граѓаните.

– Тоа што недостасува кај поголемиот дел од нив е да бидат секојдневно присутни онлајн, но не само за да се претстават, туку да го слушнат мислењето, критиките и предлозите кои доаѓаат преку социјалните медиуми. Разликата во бројот на градоначалници кои користат „Фејсбук“ споредено со „Инстаграм“ веројатно се должи на недостатокот на професионални лица и тимови за социјални медиуми кои секоја општина е потребно да ги има. Активното користење на „Твитер“ од само 5 градоначалници можеме да го толкуваме како недостаток на ресурси, но пред сè и како избегнување на оваа публика која важи за најкритизерска. Ова не е добро и мора да се промени – вели Кордалов, кој е и автор на анализата.

Само тројца градоначалници истовремено користат Фејсбук, Твитер и Инстаграм во својата работа, а само еден градоначалник, односно градоначалникот на Ранковце, Ивица Тошевски, воопшто не ги користи социјалните медиуми, покажа Анализата.

Сепак, градоначалниците се поактивни на „Фејсбук“ споредено со пратениците и министрите. Ваква анализа, направена во март годинава година, откри дека 110 од вкупно 120 пратеници користат „Фејсбук“, додека слично истражување објавено во јуни годинава покажа дека 20 од вкупно 26 министри се редовно активни на овој социјален медиум.


Уредникот на „Џумхуријет“ осуден на затворска казна за порака на „Твитер“


Анкара, 21 ноември, 2017 - 14:23 (META) 

Турскиот суд го осуди уредникот на интернет-изданието на опозицискиот весник „Џумхуријет“, Огуз Гувен, на три години и еден месец затвор врз основа на обвинението за прибегнување кон „терористичка пропаганда“, соопшти денеска весникот.

Гувен е обвинет поради порака на „Твитер“, во која е јавено дека во сообраќајна несреќа загина обвинител што го поднел првото обвинение против мрежата на проповедникот Фетулах Ѓулен.

Гувен е правно одговорен за профилот на „Твитер“ на овој медиум.

Во твитот кој бргу бил избришан е наведено дека обвинителот бил „покосен“.

Судот во Истанбул вчера пресуди дека пораката претставува пропаганда за движењето на Ѓулен, кој во Турција за смета за одговорен за минатогодишниот неуспешен пуч.

Ѓулен, кој живее во САД, ја демантира вмешаноста во неуспешниот обид за пуч.

Се очекува Гувен да ја обжали пресудата.


Вработен во „Твитер“ го деактивирал профилот на Трамп


Вашингтон, 3 ноември, 2017 - 10:09 (META) 

Твитер-профилот на претседателот на САД, Доналд Трамп, вчера на кратко исчезна од оваа социјална мрежа, но повторно е обновен, соопштија од „Твитер“.

Профилот бил неактивен 11 минути, а „Твитер“ во моментов ги истражува деталите.

Како што е наведено, профилот @realdonaldtrump бил „деактивиран“ од вработен во „Твитер“, поради што тоа му бил последен ден на работа.

Трамп, кој е активен корисник на „Твитер“ со 41,7 милиони приврзаници, засега не го коментира инцидентот.


Твитот на Обама против насилствата влезе во историјата


Вашингтон, 16 август, 2017 - 10:05 (META) 

Твитот на поранешниот американски претседател Барак Обама по повод насилствата во Шарлотвил стана најпопуларниот во историјата на „Твитер“.

Твитот на Обама, во кој го цитира Нелсон Мандела, лајкуван е три милиони пати откако е објавен на 12 август, после насилствата во Шарлотвил во Вирџинија.

– Никој не се раѓа со омраза кон другите поради бојата на нивната кожа, потеклото или вера… Луѓето мора да научат да мразат, а ако можат да научат да мразат, може да научат и да сакаат… Љубовта повеќе му прилега на човековото срце за разлика од нејзината спротивност“ напиша Обама, цитирајќи го Мандела.

Твитот е проследен со фотографија на која се гледа Обама како се смее со четири деца од различна раса, пренесува „Би-би-си“.

Фотографијата е направена во 2011 година, кога Обама го посети дневниот престој во Мериленд.


Заев: Потпретседателот на САД ми пренесе поздрав од Доналд Трамп


Скопје, 10 јули, 2017 - 20:22 (META) 

Премиерот Зоран Заев на својот твитер-профил попладнево соопшти дека имал телефонски разговор со потпретседателот на САД, Мајк Пенс, кој, како што вели Заев во твитот, ги поддржал реформите во Македонија. Потпретседателот на САД на премиерот Заев му пренел поздрав од американскиот претседател Доналд Трамп.

„Се слушнав предмалку со потпретседателот на САД, Мајк Пенс. Ги поддржа реформите во Македонија и пренесе поздрав од претседателот Трамп“, напиша Заев на „Твитер“.


Трамп се закани на Коми, размислува да ги укине брифинзите за новинари


Вашингтон, 12 мај, 2017 - 18:03 (META) 

Претседателот на САД Доналд Трамп со неколку твитови денеска предизвика вистинска сензација во јавноста, откако порача дека „можеби е подобро“ да се укинат брифинзите за новинарите во Белата куќа, а потоа му се закани на сменетиот директор на ФБИ, Џејмс Коми да не искажува негативни ставови за претседателот во јавноста, споменувајќи „снимки“.

„Бидејќи сум многу активен претседател а многу работи се случуваат, не е можно моите соработници да застанат на говорница и да бидат совршено точни. Можеби е најдобро да се укинат сите идни брифинзи за новинарите и во интерес на вистината да се даваат писмени одговори???“, напиша Трамп на Твитер.

Овој потег е испровоциран од непријатностите со кои се соочи Белата куќа поради различните објаснувања за причините Трамп да го смени директорот на ФБИ, Џејмс Коми.

Откако Трамп го смени Коми, неговите советници изјавија дека тоа го направил по препорака на заменик министерот за правда Род Розенстајн. Потоа и самиот Трамп и неговите советници истакнаа дека тој планирал да го отстрани Коми од функцијата уште пред да ја добие препораката.

По првиот твит, уследи уште еден во кој Трамп го предупредува Коми навестувајќи дека е можно да има снимки од нивните разговори.

„Коми подобро нека се надева дека нема „снимки“ од нашите разговори пред да почне да дава информации во медиумите“, напиша Трамп.


Во штабот на ДУИ, македонското знаме го пречека Билт поттурнато во заднината


Тетово, 18 април, 2017 - 16:40 (META) 

Поранешниот премиер и шеф на шведската дипломатија, Карл Билт, кој денеска има серија средби со политички лидери во Македонија, веројатно ненамерно, сакајќи да твитне фотографија дека пристигнал во штабот на ДУИ во Мала Речица во Тетово, илустрираше каде ДУИ го држи македонското знаме.

На подиумот кој е во рамките на салата за средби ги има сите други знамиња – на ЕУ, на САД, албанското, на ДУИ, па и косовското – само македонското срамежливо ѕирка од заднината.

На прашањето на „Мета“ зошто македонскот знаме е поставено таму, порптаролот на ДУИ, Бујар Османи, одговори со контрапрашање: „Како мислите зошто е поставено?“.

На дополнителното прашање за појаснување „зошто е поставено во ќош, зад сите други знамиња“, Османи одговори кусо и двосмислено „останало“.


Хакирани твитер-профилите на УНИЦЕФ, АИ, политичари и на медиуми


Лондон, 15 март, 2017 - 12:10 (META) 

Твитер-профилите на меѓународни организации, медиуми и на политички партии се хакирани, а веројатно зад тоа стојат Турците, пишува „Раша тудеј“.

Во објавите на „Твитер“ на официјалните профили на УНИЦЕФ САД и „Амнести интернешенал“ се наоѓа симбол свастика, како и хаштаговите „нациГерманија“ и „нациХоландија“.

„Се гледаме на 16 април“, пишува на еден твит, со кој се алудира на на референдумот во Турција, со кој би можело да се зголемат овластувањата на турскиот претседател Реџеп Таип Ердоган.

Исто така, твитовите содржат и линкови од „Јутјуб“, на кои се неколку снимки од Реџеп Таип Ердоган.

Сè уште не е јасно кој стои зад хакирањето, а „Булмберг“ пишува дека оштетен е „Ројтерс Јапонија“. „Форбс“, „Би-би-си“ за Северна Америка и германскиот весник „Велт“.

Хакирани се профилите на градоначалникот на Бордо, Ален Жипе, и на Марсело Клор од Европскиот парламент.


Рорабакер и на „Твитер“ повикува Македонија да го следи примерот на Чешка и на Словачка


Вашингтон, 9 февруари, 2017 - 14:12 (META) 

Републиканскиот конгресмен и воедно претседател на Подкомитетот за европски работи на американскиот претставнички дом, Дана Рорабакер, продолжува да ја промовира контроверзната идеја за поделба на Македонија и на „Твитер“.

Тој, одговарајќи на пораки и на реакции на „Твитер“ околу неговите ставови за Македонија, меѓу кои и на поранешниот шеф на македонската дипломатија, Никола Димитров, вели дека „ако народите во Македонија не се сложуваат меѓу себе, можат да го следат примерот на Чешка и на Словачка (двете земји егзистираа како една држава, Чехословачка, пред да се разделат по мирен пат во 1993 година).

Конгресменот Рорабакер во интервјуто за албанската телевизија „Визион плус“, изјави дека „Македонија не е држава“, дека „Косовците и Албанците од Македонија треба да станат дел од Косово“, а „другиот дел од Македонија треба да стане дел од Бугарија или која било друга држава на која сметаат дека ѝ припаѓаат“.

Американскиот интернет-магазин „Политико“ во текст објавен во ноември минатата година, го нарекува Рорабакер „омилениот конгресмен на Путин“.