Москва се надева дека администрацијата на новоизбраниот претседател Доналд Трамп нема да ги повтори грешките на својот претходник, кои ги уништија билатералните односи меѓу Русија и САД, рече во интервју за италијанскиот весник „Кориере дела сера“, рускиот министер за надворешни работи Сергеј Лавров.
– Секако, позитивни сме во врска со намерата на Трамп да развие соработка меѓу двете земји, која ја покажа за време на претседателската кампања – рече Лавров.
Тој додаде дека Русија секогаш е отворена за искрен и прагматичен дијалог со САД, за сите глобални и билатерални прашања на база на принципот на заемно почитување и еднаквост, а земајќи ги предвид интересите на едната и на другата страна и немешајќи се во внатрешните работи, рече Лавров.
