Ловџија влегол и пукал во кругот на касарната „Еребино“


       
Тетово, 24 февруари, 2016 - 15:49 (META) 

Непознато лице во маскирен елек, со ловечка пушка и со ловечки кучиња вчера утро влегло во кругот на касарната „Еребино“, во тетовското село Сиричино и испукало неколку истрели, информираат од МВР.

Според полициските информации, вчера околу 7.15 часот, професионален војник во оградениот круг на касарната забележал непознато лице во маскирен елек, со црна капа на главата, ловечка пушка во рацете и ловечки кучиња, а потоа слушнал два истрели.

Непознатото лице било предупредено, но успеало да избега. По настанот бил извршен преглед на теренот и биле пронајдени 5 патрони, калибар 12 милиметри.

Од полицијата велат дека се преземаат мерки за целосно расчистување на случајот.