Сенатот на САД вчера со 97 гласови „за“ даде одобрение за завршување на расправата за ратификација на договорот за зачленување на Црна Гора во НАТО. Расправата и ратификацијата се очекува да се случат во наредните денови.
Протоколот е ратификуван од страна на 24 од вкупно 28 членки на Северноатлантската алијанса. Кога сите 28 членки ќе го ратификуваат, Црна Гора ќе стане 29. земја членка на НАТО и трета поранешна република на СФРЈ што влегува во овој сојуз.
На гласањето дали да продолжи расправата во американскиот Сенат, вчера против беа двајца републикански сенатори – Ренд Пол и Мајк Ли.
Пол, осврнувајќи се на обврската на САД да ја брани Црна Гора ако биде нападната, рече дека САД со децении трошеле многу пари и пролеале многу крв, многу повеќе од другите членки на НАТО и дека сенаторите треба да размислат дали има смисла да се гарантира безбедноста на уште една земја.
