Претседателот на СДСМ, Зоран Заев, се сретна со министерот за надворешни работи на Бугарија, Даниел Митов, придружуван од заменик-министерот, Валентин Порјазов, и од амбасадорот на Бугарија во Македонија, Иван Великов-Петков.
Теми на разговорите беа актуелната политичка криза во државата и односите помеѓу Македонија и Бугарија.
– Се обидуваме низ разговори за создадеме услови за преговори што ќе доведат по мирен пат до решенија на длабоката политичка криза во Македонија. Во интерес на европерспективите на граѓаните и на државата, потребно е за краток временски период, разговорите да резултираат со договор за повлекување на Груевски од премиерската позиција, најмалку шест месеци пред формирањето на Владата што треба да ги организира и да ги спроведе изборите, како што налагаат елементарните услови за фер и демократски избори – му посочил Заев на Митов.
На средбата позитивно биле оценети активностите на опозицијата и на надпартиската коалиција Граѓаните за Македонија, во духот на европските вредности.