Шансите за решавање на политичката криза со помош на меѓународните претставници, актуелните политички предизвици на Македонија, економските проблеми, закочените евроатлатски процеси, беа темите на коишто разговараа претседателот на СДСМ, Зоран Заев, и пратеникот во Собранието на Франција, Филип Диран.
– Неопходни се споделени гаранции за имплементација на препораките од извештајот на Прибе, бидејќи посочените критични области се кочничар за демократско функционирање на институциите на системот, кои се комплетно партизирани, како и за организирање слободни избори – изјави претседателот Заев.
На средбата е изразена особена загриженост за проблематичниот изборачки список, како и за недозволивото функционирање на републичкиот јавен обвинител, на обвинителот за организиран криминал, на судството, по директиви на актуелната власт.
– Доколку утре, со помош на пријателите од Европската Унија и од САД, не бидат договорени организацијата на влада и механизмите што треба да обезбедат демократски институции и избори, СДСМ ќе пристапи кон алтернативни начини за остварување на овие цели – најави претседателот Заев.
