Претседателот на СДСМ, Зоран Заев, денеска во две одделни средби се сретна со министерот за надворешни работи и за европски прашања на Кралството Белгија, Дидие Рејндерс, и со амбасадорот на Турција во Македонија, Омур Солендил.
На средбата со белгискиот министер Рејндерс разговарале за нарушените слободи и права на граѓаните, узурпацијата на правосудството, на медиумите и на државниот систем од власта и за можните излезни решенија, информираат од СДСМ.
– Нов републички јавен обвинител, нов обвинител за организиран криминал, средување на состојбите во медиумската сфера и преодна влада која ќе ги организира и спроведе следните избори во Македонија се инсистирањата на СДСМ во насока на излез од ситуацијата во која се наоѓа Македонија – изјавил Заев на средбата со министерот Рејндерс.
Од СДСМ му посочиле на министерот Рејндерс дека се решени да ги вратат слободата и демократијата во Македонија и дека од тоа нема да има отстапки.
Со амбасадорот на Турција во Македонија, Омур Солендил, пак, било разговарано за актуелната политичка ситуација и за можностите за решавање на политичката криза.
– Откривањето на „Вистината за Македонија“ ќе стави крај на недемократското владеење што го наметна оваа власт во изминативе девет години, узурпирајќи ги институциите на државата и слободната волја на граѓаните – изјавил Заев на средбата со амбасадорот Солендил.
