Во последните 24 часа, потврди за искажана намера за барање азил Министерството за внатрешни работи (МВР) издало на вкупно 3.673 мигранти, кои влегле на територијата на земјава од Грција.
Од нив најголем број се сириски државјани, вкупно 2.175, потоа од Авганистан (788) и од Ирак (428).
Од почетокот на издавањето на потврдите, на 19 јуни оваа година, кога стапија на сила измените на Законот за азил и привремена заштита, заклучно со вчерашниот ден, според МВР, вакви документи им се издадени на вкупно 224.911 мигранти.
Според државјанството, најбројни се мигрантите со потекло од Сирија, односно 142.925 лица, потоа од Авганистан (47.953), Ирак (17.190), Пакистан (4.749), Иран (4.335), Палестина (1.873), Сомалија (1.117), Бангладеш (1.035), Конго (508), Мароко (469), Алжир (307), Либан (292) и од Нигерија (268).
Според податоците на МВР, засега нема промени во бројот на мигранти што побарале азил во земјава. Од јуни досега, да останат во Македонија побарале 70 странски државјани.
