Во новата епизода на „Шорткат“ ќе емитуваме дел од интервјуто со Ева Цветковска, претседателка на Универзитетското студентско собрание на Универзитетот „Св. Кирил и Методиј“ во Скопје (УСС УКИМ). Во интервјуто Цветковска зборува за државните мерки субвенциониран студентски оброк и студентски стипендии, а го најавува и отворањето на Студентскиот културен центар, прв од ваков вид во земјава.
Во 45-тата епизода на вестите за млади информираме и дека женскиот пол доминира во вкупниот број на студенти во Северна Македонија, како и за одлуката на Град Скопје средношколците да можат да го користат јавниот превоз бесплатно и во текот на летото.
Информираме и за законската рамка за абортус во земјава и за тоа како стоиме по ова прашање во однос на регионот и на Европа.
Ја претставуваме новата платформа на Фондација Метаморфозис, „Пиши Им“, со која граѓаните ќе можат да комуницираат со општинските советници, а ќе го проследиме и успехот на македонската Кантерстрајк репрезентација на Европското првенство во играта CS:GO.
Најновото издание на „Шорткат“ ќе биде објавено вечерва во 19:00 часот на нашите канали на социјалните мрежи.
