Најмалку 18 луѓе, од кои 13 египетски полицајци, загинаа синоќа во напад на контролна точка на полуостровот Синај, соопшти египетското министерство за внатрешни работи.
Министерството за внатрешни работи додава дека нападот е извршен во близина на градот Ал Ариш, главниот град на покраината Северен Синај.
„Контролната точка Сафа е погодена со минофрлачка граната, при што загинаа 13 полицајци“, се наведува во соопштението.
Според министерството за внатрешни работи, станува збор за минофрлачки напад, додека египетските медиуми, повикувајќи се на безбедносни извори, пренесуваат дека станува збор за самоубиствен напад изведен со автомобил бомба.
Одговорноста за нападот ја презеде џихадистичката организација Исламска држава (ИД).
Џихадистите тврдат дека бомбашот со воено име Абу ал-Каакаа, Египќанец, ја активирал бомбата на контролниот пункт.
„Контролната точка потоа беше нападната“, се наведува во објавата на Исламска држава на интернет.
Станува збор за напад со најмногу жртви во изминатите неколку месеци на Синај, каде египетскиот разгранок на Исламска држава речиси секојдневно ги напаѓа припадниците на војската и на полицијата.