Во Грција нови рестрикции, невакцинираните ќе мора да прават брзи ковид тестови на неделно ниво

Фото: Мета.мк

Во Грција денеска стапија на сила нови заштитни мерки против ширењето на ковид-19 и рестрикции, кои најмногу финансиски ќе ги погодат невакцинираните, јави грчкиот „Екатимерини“.

Мерките подразбираат еднаш или двапати седмично вработените во јавниот сектор и во приватните фирми што не се вакцинирани да се тестираат за ковид, а пристап до некои затворени простори само за тие што се вакцинирани или имаат сертификат за прележан ковид во последните шест месеци.

Новите мерки ќе важат до 31 март.

Инаку, денеска во Грција повторно се отворија училиштата, па и за учениците и наставниците што не се вакцинирани ќе бидат задолжителни тестирањата.

Според новите правила што се на сила од денеска, сите вработени во приватниот и во јавниот сектор без потврда за вакцинација или за прележан ковид во поновиот период ќе мора да направат еден брз тест седмично.

Два теста седмично ќе мора да прават вработените во високото школство и науката, во туристичкиот сектор, во угостителските објекти и во индустријата за забава, како и учениците и студентите. Тестирањата ќе се вршат во приватни лаборатории, по цена од 10 евра за тестирање. Само учениците ќе се тестираат бесплатно.

Сите простори за забава, како и рестораните, баровите и кафулињата ќе им бидат достапни само за вакцинираните или оние што неодамна прележале ковид, а при влез ќе се вршат проверки преку мобилни апликации.

Невакцинираните ќе може да влезат во кината, театрите, музеите, археолошките локалитет и фитнес салите само со потврда за негативен брз тест за ковид не постар од 48 часа. Сите вакви објекти ќе имаат право да примаат само вакцинирани гости.

Носењето заштитни маски е задолжително за сите во јавните затворени простори или при големи собири на отворено.

Потврда за вакцинација, за прележан ковид-19 или негативен брз тест не постар од 48 часа ќе се бара и за секое патување со авион, воз, брод или на меѓуградска автобуска линија за сите патници на возраст од 12 години или постари.

Инаку, вакцините во Грција се достапни за сите постари од 12 години и се бесплатни.
Најновите бројки за периодот од 15 часот во саботата до 15 часот вчера говорат за 1.319 новозаразени и 28 починати.