Советничката група на ВМРО-ДПМНЕ во Советот на Општина Карпош денеска поднесе барање до претседателот на Советот на Општина Карпош, Бранко Ристов за отпочнување процедура за одземање на мандатите на советниците кои што три пати последователно не дошле на седница на Советот.
Од партијата сметаат дека не смее повеќе да се толерира и плаќа неработењето.
„Треба да се знае дека во Карпош времето на неработниците за граѓаните е завршено. Треба да знаат сите оние кои што не ги почитуваат позитивните законски прописи дека консенквенците за нивното работење, односно неработење треба да се поднесе. Три пати не биле советници од повеќе советнички групи, но ние цврсто стоиме на ставот дека секој еден кој што ќе нема оправдание треба да го изгуби советничкиот мандат. И оној што следува потоа на листата да си дојде во Советот на Општина Карпош“, порача Роберт Вељановски, советник во Карпош од ВМРО-ДПМНЕ.
Тој рече оти се очекува до следната седница да биде завршена процедурата и на дневниот ред на таа седница да се поднесе точка на Дневниот ред за одземање на мандатите. Вељановски порача дека тоа би било во согласност со Законот за локална самоуправа и членовите од Деловникот за работа на Советот на Општина Карпош.
