Грчкиот премиер Алексис Ципрас отвори битка со бунтовниците во СИРИЗА неколку часа пред денешното гласање за втората листа приоритетни мерки.
Според владини извори, Ципрас во разговор со своите соработници индиректно ги нападнал поранешните министри Јанис Варуфакис и Панајотис Лафазанис, кои деновиве продолжуваат со остри напади против него, коментирајќи дека не понудиле алтернативно решение за спас на државата и за нејзино задржување во еврозоната ниту кога тоа од нив директно го побарал.
– Нека престанат да се кријат зад гаранцијата за државата која дојде со мојот потпис – истакнал Ципрас, критикувајќи ги дека нивните алтернативни решенија се нереални и во иста линија со предлозите на германскиот министер за финансии, Волфганг Шојбле, односно излез на државата од еврозонта и враќање на драхмата.
Ципрас со ова јасно стави до знаење дека не планира да слуша или да прифаќа совети за исфрлање на државата од еврозоната и строго ќе ја задржи линијата за спроведување на пакетот мерки за да не се ниша одново бродот со европската перспектива на Грција.
Оваа изјава на грчкиот премиер доаѓа непосредно пред денешното гласање на кое ќе се види дали 30 бунтовници кои минатиот пат гласаа против мерките ќе го сменат мислењето или и понатаму ќе ѝ вртат грб на владината одлука за договор со кредиторите.
Ципрас несомнено ќе ја има поддршката од трите опозициски партии, Нова демократија, ПАСОК и Река, кои бараат мерките да се спроведат и да се направат реформи, а остро се противат на сценаријата за предвремени избори.
Вечерашното гласање, покрај тоа што ќе го отвори патот за спроведување нови реформи, речиси сигурно ќе доведе до нови промени во СИРИЗА и до можен конгрес на партијата за суштински внатрешни промени.
