Споровите на државите од рутата низ која минуваат бегалците може да ја заострат ситуацијата на Западен Балкан и во поширокиот регион, изјави денеска словенечкиот премиер Миро Церар, по завршувањето на вонредниот самит на ЕУ.
– Балканот не е доволно стабилен за да ја издржи таквата ситуација. Затоа е многу важно особено внимание да се посвети на Балканот и на поширокиот регион, да им помогнеме, па и финансиски. Тоа и го истакнав во расправата – рече Церар.
Словенечкиот премиер, пред почетокот на самитот, се сретна со претседателот на Европската комисија, Жан-Клод Јункер, и го информирал за потенцијалното влијание на бегалската криза врз целиот регион околу Словенија.
– Го предупредив дека треба да се направи сè за да не дојде до зголемена тензија меѓу Хрватска и Србија и оти треба да им се помогне на овие земји кои сè уште не се дел од ЕУ, но добро соработуваат со неа – рече Церар, додавајќи дека Словенија сака да дејствува како посредник во тие можни спорови.