Фекални бактерии во мајонезот причина за труењето на 120 лица во Виница


Штип, 27 септември, 2018 - 16:19 (META) 

Причина за труењето на 120 граѓани во Виница било присуство на фекални бактерии во мајонезот што го содржеле сендвичите, покажаа резултатите од земените примероци од страна на Центарот за јавно здравје од Кочани.

Осуммина со потешки симптоми, се на болничко лекување на Инфективното одделение на Клиничката болница во Штип.

Сендвичарницата е затворена се до подобрување на хигиенските услови за подготвка на храна. Од Агенцијата за храна и ветеринарство по лабораториските наоди, утврдиле ниско ниво на одржување на хигиена внатре во објектот, при чувањето на храната со која се подготвувале сендвичите, во просториите каде се подготвува храната, но и личната хигиена на вработените.

– Во анализираните примероци е пронајдено присуство на стафилококни бактерии, што укажува дека носители се лицата што ја подготвуваат храната – појаснуваат од АХВ.

Веќе неколку случаи на масовно труење со храна се регистирирани последните три месеци во Источниот регион. Сите се поради недоржување на хигиена на вработените и просториите каде се подготвува храната.


Путин: Лицата осомничени од Лондон за „Скрипаљ“ не работеле за војската


Владивосток, 12 септември, 2018 - 11:55 (META) 

Рускиот претседател Владимир Путин денеска порача дека руските безбедносни служби ги идентификувале двете лица кои Велика Британија ги посочи како одговорни за труењето на пребеганиот руски агент Сергеј Скрипаљ и неговата ќерка. Тој рече дека осомничените се цивили и не работеле за војската, односно за нејзината разузнавачка служба.

– Се надевам дека тие ќе контактираат со медиумите, ќе излезат и ќе раскажат се за себе – изјави Путин во Владивосток, каде учествува на Источниот економски форум.

Британската премиерка Тереза Меј и британското обвинителство ги посочија двајцата Руси, кои тие ги идентификуваа како Александар Петров и Руслан Боширов, како извршители на труењето на Скрипаљ и неговата ќерка Јулија во март во градот Солсбери близу Лондон.


Водата во Гостивар е безбедна за пиење, тврди Институтот за јавно здравје


Скопје, 31 октомври, 2017 - 15:19 (META) 

Институтот за јавно здравје информираше дека водата од водоводот во Гостивар е исправна и безбедна за пиење. Тоа го покажале физичко-хемиските анализи, при што е утврдено дека нема присуство на пестициди, а исто така водата е бактериолошки исправна.

Проблемот со водата во Гостивар се случи кон крајот на минатата седмица и во текот на викендот, кога 360 гостиварци побараа лекарска помош поради дијареа, повраќање и зголемена телесна температура. Главниот сомнеж падна на водата од градскиот водовод.


Петнаесет лица затруени во зградата на ЕУ во Брисел


Брисел, 13 октомври, 2017 - 13:47 (META) 

Петнаесет лица се затруле денеска од испарување на хемиска материја во зградата на Европската Унија во Брисел, каде што се одржуваат официјални состаноци.

Пет лица се хоспитализирани, соопшти портпаролот на бриселската противпожарна служба, Пјер Мејс.

Зградата „Европа“, во која редовно се одржуваат министерски состаноци, морало привремено да биде евакуирана, а тие што биле присутни се повикани да се префрлат во соседната зграда на ЕУ.

– Се случило мешање на хемиски производи од кујната и тоа предизвикало испарување кое затруло петнаесет лица – рече Мејс, кој додаде дека лицата имале симптоми на чешање на очите и повраќање.


Затруени 23 работници во фабрика во Штип


Штип, 7 октомври, 2017 - 10:20 (META) 

Најмалку 23 вработени во фабрика во Штип вчера попладне се пренесени во болница со знаци на труење. По укажаната лекарска помош, лицата се пуштени на домашно лекување, а еден е задржан за понатамошна опсервација.

Инспектори на Државниот санитарен и здравствен инспекторат веднаш излегле на терен.

– Затворивме две трпезарии каде што се јадело и мензата каде што се подготвувала храната што се носела во канистри. Државниот санитарен и здравствен инспекторат зеде брисеви и мостри од храната и од сите површини во трпезариите и во мензата – изјави директорката на ДСЗИ, Ирина Бухова.

Засега од ДСЗИ не сакаат да ја коментираат причината за труењето и најавуваат дека ќе излезат со поконкретни информации откако ќе завршат сите испитувања.


Во „Седмица“ имало салмонела, вели Државниот санитарен и здравствен инспекторат


Скопје, 23 август, 2017 - 16:29 (META) 

Државниот санитарен и здравствен инспекторат соопшти дека шест лица во сендвичарата „Седмица“ добиле труење со храна и дека тоа било предизвикано од бактеријата салмонела.

„Врз основа на должината на инкубацискиот период, клиничката слика на затруените лица, епидемиолошката анкета, епидемиолошката поврзаност на затруените лица, докажување на бактеријата Salmonella enteritidis кај 6 (шест) затруени лица можеме да констатираме дека се работи за труење со храна предизвикано од Salmonella enteritidis“, информираат од ДСЗИ.

Од Државениот санитарен и здравствен инспекторат соопштуваат дека и натаму ќе ја следат состојбата и дека ќе извршат контролен надзор во објектот на сендвичарата и дека ќе преземе соодветни правни мерки.


Десетина затруени лица во болница, јаделе во „Сендвичара 7“ во Карпош


Скопје, 18 август, 2017 - 20:43 (META) 

Десетина лица се во болница откако, како што изјавиле се затруле со храна од познатата скопска сендвичарница „Сендвичара 7“ во Карпош, информира Министерството за здравство

„До завршување на вонредниот надзор бројката на лица со стомачни тегоби, проливи, гадење, повраќање и висока температура 39-40 степени изнесува: 9 лица згрижени на ЈЗУ УК за инфективни болести и фебрилни состојби, од кои 5 хоспитализирани и 4 амбулантски лекувани, а на инфективното одделение во ЈЗУ ГОБ „8-ми Септември” во моментот во дневна болница беа згрижени уште тројца пациенти“, стои во соопштението.

Иако во објектот се врши завршна подготовка на храна, која се доставува од централната кујна на синџирот сендвичарници, извршена е вонредна контрола и во локалот и и земени се брисеви од вработените и работните средини, како и мостри храна.

Наложена е вонредна дезинфекција, а објектот е времено затворен.


Труење или стомачен вирус испрати гости на струшки хотел в болница


Струга, 17 јули, 2017 - 15:23 (META) 

Гостин на хотелот „Изгрев“ на струшкото крајбрежје се пожали на „Мета“ дека попладнето во саботата, откако претходно појадувале во хотелот, тој и неговото семејство почнале да чувствуваат мачнина, а потоа почнале и да повраќаат, поради што побарале лекарска помош во Општата болница во Струга, каде разбрале дека имало и други туристи од хотелот „Изгрев“ со исти симптоми. Гостинот се сомнева дека во прашање е труење со храна. Но, како што дознаваме, причините би можеле да бидат и други, односно можно е и да станува збор за стомачен вирус, бидејќи во последниот период во Охридско-струшкиот Регион се забележани позначителен број вакви случаи.

Од Општата болница во Струга велат дека во текот на викендот примиле тројца странски државјани со симптоми што може да значат и труење, но и друго, на пример, стомачен вирус. Како што велат, за причините за симптомите, засега не можат да се изјаснат. Напоменуваат дека пациентите се соодветно третирани според симптомите.

Од хотелот „Изгрев“ ни рекоа дека и кујната и целиот хотел ги исполнуваат сите стандарди и дека секогаш се подготвени за соработка со властите доколку нешто треба да се утврдува. Сепак, и оттаму ни посочија дека е можно да станува збор за состојба поврзана со неприлагоденост на организмот на некои туристи кои доаѓаат од климатски постудени подрачја или, пак, за стомачен вирус. Велат и дека е можно, ако навистина станува збор за труење со храна, да е во прашање храна што туристите ја консумирале на друго место.

– Кај нас минатата недела санитарна инспекција изврши редовен надзор, ни провери сè и сè беше в ред. Имаме записник од тоа, сè е како што треба. Некои од луѓето пред да дојдат кај нас имаат поминато и во неколку други хотели. Ние имаме персонал 200 луѓе, а повеќе од 1.000 луѓе се во хотелот и нема други такви проблеми. Овие појави се можни затоа што минатата недела температурата на воздухот беше премногу висока, па се појавуваат стомачни вируси. Болниците во Охрид и во Струга се полни поради тие стомачни вируси, тоа е јавна тајна… Ние правиме сè што се бара, работиме законски, а нашата кујна работи по сите светски стандарди – изјави за „Мета“ Илија Џајковски од хотелот „Изгрев“.

За проверка со состојбата со стомачните вируси се јавивме и на инфективното одделение во Општа болница Охрид, каде началникот, д-р Лидија Љаткоска, појасни дека и кај нив викендот се примени и странци и македонски граѓани со симптоми на гастроентеритис. Вели дека бројката на вакви случаи, иако повисока од другите периоди на годината, е сепак во рамките на очекуваното за туристичката сезона, односно во последните десетина дена немало нагло зголемување на бројката на пациенти примени со симптоми на повраќање и со висока температура.


АХВ: Храната во „Леар“ била соодветно чувана и послужена, а мензата чиста


Скопје, 9 јули, 2017 - 14:40 (META) 

Храната во „Леар“, каде 23 лица вчера пријавија лесни симптоми на труење, била соодветно дистрибуирана, чувана и послужена, во оригиналното пакување и со адекватен рок на употреба, а мензата ги исполнува хигиенските услови поради што не е изречена мерка за нејзино привремено затворање, соопшти денеска Агенцијата за храна и ветеринарство.

Инспектори на АХВ во соработка со Санитарната инспекција денеска и вчера направиле вонредна контрола во тетовската фабрика при што зеле мостри за лабораториско испитување од храната која била послужена, од работните површини во мензата, како и од вработеното лице што ја послужувало храната, а на кое му било извршен и дополнителен здравствен преглед

– Агенцијата за храна и ветеринарство ќе продолжи да го следи случајот и да ја информира јавноста за секоја новина поврзана со него. Како одговорна институција за безбедноста на храната, Агенцијата за храна и ветеринарство апелира во услови на висока температура и зголемен ризик од расипување на храната и појава на труења, граѓаните да внимаваат од каде купуваат храна, односно да ја набавуваат од регистрирани оператори, каде се запазени безбедносните критериуми, како и да водат сметка за личната и за хигиената при подготовка и чување на храната – апелираат од АХВ.


Повторно труење со храна кај вработени во тетовската фабрика „Леар“


Тетово, 8 јули, 2017 - 16:41 (META) 

Дваесет и пет вработени од фабриката „Леар“ биле примени во тетовската клиничката болница заради интервенција поради гадење и повраќање. Работниците потоа се пуштени на закрепнување дома. Тоа се случило по денешниот појадок, а од тетовската брза помош информираа дека кај дел од луѓето интервенирале во фабриката, а некои самите дошле да побараат помош.

Според неофицијалните сознанија, труењето најверојатно настанало од консумирање салама или паштета кои за време на појадокот им биле дадени на работниците.

– Колегите добиле повик, па на самото место во фабриката за производство интервенирале и на прв преглед кај четворица констатирале симптоми на гадење, повраќање и болки. Не им дале терапија, туку ги однеле во инфективна клиника за да се консултираат со инфектолог. По некое време со возила на „Леар“ донесени во нашата служба се околу седум пациенти со гастроинтестинални симптоми, со повраќање и со болки, а некои и колабирале, но без драматична клиничка слика. Потоа дошле уште од работниците и во инфективна клиника. По добиената терапија сите се испратени дома – изјави доктор Гзим Нуредини од тетовската брза помош.

Ова е вторпат да се случи вработените да имаат здравствени проблеми по јадење во фабриката. Во март дури 223 работници беа однесени во болница поради повраќање и слични симптоми поради стафилокока во тестенините со месо, кои ги конзумирале во фабриката.