Oколу 200 ученици од одделенска настава од училиштата ОУ„Дебарца“ од село Белчишта, кои учат на македонски јазик, и ОУ„Нури Мазари“ од струшкото село Корошишта, кои учат на албански јазик, заедно со нивните наставници, организираа заедничка програма и прослава на денот на шегата 1 Април.
Во село Корошишта, населено со етнички Албанци, учениците од двете училишта, со најразлични маски и со шаренило од бои, покажаа дека за децата не постојат никакви бариери, бидејќи секогаш зборуваат со јазикот на љубовта и со отворените детски души и насмевки.
Домаќините на сите присутни им приредија срдечен пречек и со дефиле на маскираните дечиња по улиците на селото ги израдуваа жителите на село Корошишта со ваквиот несекојдневен настан. Покрај богатата забавна програма и дружење, најдобрите и најкреативни маски беа почестени со признанија и со скромни награди.
