Градоначалникот на Струга, Зијадин Села нема ништо против да се реконструира градскиот плоштад
Градоначалникот на Струга, Зијадин Села нема ништо против да се реконструира градскиот плоштад

Стружани бараат санирање на Градски плоштад и на Споменикот на револуцијата, на кејот на реката Црн Дрим. Спомен-обележјето е изградено пред повеќе децении, во чест на повеќе од 3.000 учесници во НОВ и во ПОМ на Македонија (1941 – 1945) и ги симболизира заедништвото и саможртвата на загинатите 335 борци и жртви на фашистичкиот терор од Струга и од Струшко, од кои 182 Македонци, 128 Албанци, 17 Власи, 4 Турци, 3 Роми и други.
Без интервенции во меѓувреме, спомен-обележјето изгледа доста грдо, напуштено, руинирано. Граѓаните опоменуваат дека Струга заслужува подобар плоштад, пред сè, поради туризмот, меѓународниот поетски фестивал „Струшки вечери на поезијата“, но и како катче каде се среќавале со своите пријатели за да се видат и да поразговараат. Денеска таа можност и задоволство им се одземени.
– Крајно време е плоштадот да се санира. Навистина е непријатна сликата што ја остава во најстрогиот центар на градот. Треба малку да се облагороди, а и да се заштити Споменикот на револуцијата кој е исправен пред временските непогоди – коментираат најчесто стружани.
Градоначалникот на Струга, Зијадин Села, нема ништо против да се реконструира Градски плоштад, заедно со Споменикот на револуцијата, за кој и самиот оценува дека е во очајна состојба. Но, тој упатува на неопходноста Министерството за култура, претходно, да даде дозвола за реконструкција, односно за санирање на споменикот.
– Треба да имаме добро уреден плоштад, а не плоштад кој е запоставен од Министерството за култура. Нема инвестиции за него и тој е руиниран. Иако јас имам волја, барем еден парк тука да се направи со тоа што би се зачувал и споменикот, сепак ни треба дозвола од Министерството за култура – додава Села.