Генералштабот на српските вооружени сили му достави предлог на претседателот Александар Вучиќ за повторно воведување на задолжителниот воен рок во Србија во траење од четири месеци, пренесува весникот Данас.
Оваа информација денеска ја соопшти српското Министерство за одбрана, а ваквиот чекор би бил „со цел да се подигне одбранбената способност на српската војска преку подмладување и унапредување на пополнетоста и обученоста на активниот и резервниот состав“.
Како што се наведува во соопштението, предлогот на српскиот генералштаб доаѓа по деталното разгледување на општата безбедносна состојба и современите предизвици со кои се соочува Србија како воено неутрална земја, кои „наметнале потреба за прилагодување на моделот за пополнување на војската, а кој би овозможил јакнење на вкупниот регрутен потенцијал и оспособување на поголемиот дел од граѓаните за одбрана на земјата“.
Можноста за воведување на задолжителен воен рок неодамна ја најави и српскиот министер за одбрана во техничкиот мандат Милош Вучевиќ.