MPB demanton dhe hedh poshtë si të pavërteta pohimet e mediave greke se gjatë intervenimit të djeshëm për pengimin e futjes ilegale të emigrantëve në vend te pika 59, forcat e sigurimit kanë shkelur në territorin grek. Ky është qëndrimi zyrtar i MPB, thonë për “Meta” nga Ministria.
“Gardhi është pesë metra në brendinë e territorit të RM-së, kështu që janë të pavërteta pohimet se forcat policore gjatë pengimit të hyrjes ilegale kanë shkelur në territorin grek” thonë nga MPB.
Prej atje sërish theksojnë se gjatë incidenteve të djeshme nuk ka pasur kurrfarë reagimi nga policia greke e as që kanë qenë të informuar se ka mundësi të ketë tensione në kufi.
“E ku ka qenë policia greke që të ndërmerr çfarëdo masash dhe t’i njoftoj autoritetet maqedonase se në drejtim të linjës kufitare lëviz një grup më i madh i emigrantëve për të shkaktuar incidente” shtojnë nga MPB.
