Француската полиција спречила двајца мажи во извршување напад врз припадници на полицијата и на војската во градот Орлеан, соопшти денеска министерот за внатрешни работи, Бернар Казнев.
Двајцата Французи, на возраст од 20 и од 24 години, се наоѓаат на распит, рече Казнев и додаде дека се верува оти двајцата одржувале контакти со други Французи за кои се мисли дека во моментов се наоѓаат во Сирија, а кои се осомничени за организирање заговори.
Во соопштението, министерот навел дека дури 10 напади се спречени годинава во Франција.
Последната серија терористички напади во Франција беше извршена на 13 ноември во Париз, при што беа убиени 130 лица, а ранети повеќе од 350.