Кон крајот на месецов, Скопје ќе биде домаќин на „Скопје тату шоу“ (Skopje Tattoo Show 2023), настан кој ќе ги собере ентузијастите за тетоважи, уметниците и љубопитните умови и на кој ќе бидат прославени уметноста, културата и самоизразувањето преку тетовирањето.
На конвенцијата за тетовирање ќе гостуваат познати домашни и странски тату артисти, а посетителите ќе имаат можност да видат како работат овие мајстори и, доколку имаат желба, да се тетовираат.
Настанот ќе се одржи на 26 и 27 август во хотелот „Парк“ и ќе биде од компетитивен карактер – на крајот од конвенцијата ќе бидат доделени награди за најдобрите тетоважи во повеќе категории.
На конвенцијата се најавени и музички настапи, танцов перформанс, предавање за психологијата на телесната уметност и работилници.