На враќање од закројување на лозјата, вчера, на излез од селото Долани кај Штип, се превртело возило во кое се возеле тројца штипјани, при што на местото на несреќата починал 50-годишен штипјанец, кој го управувал возилото. Двајцата негови сопатници завршиле со тешки телесни повреди. Едниот има повреда на ’рбетот, а другиот завршил со скршеници на двете нозе.
– Во непосредна близина на крстосницата со магистралниот пат Штип – Радовиш, вчера, околу 20.10 часот, се случи сообраќајна несреќа во која патничко моторно возило, „цитроен ц5“ со бугарски национални ознаки, управувано од 50-годишен возач од Штип, излетало надвор од коловозот и се превртело – информираше портпаролката на СВР Штип, Гордана Панајотова.
Возачот и двајцата сопатници со возило на итна медицинска помош се пренесени во Клиничката болница во Штип, каде е констатирана смрт кај возачот, а кај двајцата сопатници телесни повреди.