„Денеска присуствувавме на продолжението на сагата наречена ,,да се оневозможи почетокот на работата на Анкетната комисија“. Три дена присуствуваме на иста завршница, но во различни сценарија. Очигледно е дека ВМРО-ДПМНЕ нема намера да овозможи пред оваа анкетна комисија да се појават повиканите сведоци и тоа сака да го направи според свое определено сценарио“, вели Петре Шилегов, претседател на Анкетната комисија за скандалот со прислушувањето.
– Денеска, за жал, таквото сценарио беше зачинето со обиди за моја лична дискредитација и тоа го оставам на личното воспитување на пратениците на ВМРО-ДПМНЕ. Комисијата не успеа да изгласа дневен ред како што беше, впрочем, и во средата за да не може официјално да биде повикан Сашо Мијалков на денешната седница да даде своја изјава. Се прават обиди на веќе закажана седница да ѝ се додаваат нови точки на дневен ред. Обидот да се пополнува или дополнува дневниот ред со точки кои веќе се закажани како предмет на работа на комисијата не е ништо друго туку евтин обид да се исценира дека поради недостиг од волја или поради незнаење на претседателот на комисијата, тие точки на дневен ред не се усвоени. Жал ми е што искусни пратеници немаат елементарно познавање на деловникот. Меѓутоа, тоа е нивно – вели Шилегов.
Останува фактот, рече тој, дека денеска е спречен обидот да се појави пред Анкетната комисија Сашо Мијалков, којшто можеше да посведочи за именувањето на судиите, за апсењето на Љубе Бошковски, за сваровски-судиите, за пукањето што било вмровска работа, за нарачувањето пресуди и за ред други работи.
