Заменик-претседателката на СДСМ, Радмила Шекеринска, придружувана од Виктор Габер, член на Комисијата за надворешни работи, денеска се сретна со Алојз Петерле, копретседавач на Мешовитиот парламентарен комитет меѓу Република Македонија и Европска унија.
Главните теми на разговорот беа можностите за решавање на политичката криза во Македонија, начините за враќање на демократски институционален систем во државата, како и владеењето на правото.
Заменик-претседателката Шекеринска го информираше копретседавачот Петерле за причините што ја доведоа земјата во тешката политичка и државна криза.
– Неопходно е одделување на државата од партијата, преку формирање преодна влада, чија цел ќе биде нормализација на Македонија и создавање услови за одржување слободни, фер и демократски избори – рече заменик-претседателката Шекеринска. Таа додаде и дека на граѓанскиот протест што се одржа на 17 мај, граѓаните во Македонија ја испратија пораката дека се обединети и единствени околу идејата за враќање на слободата и на демократијата во државата.