Миграциската криза како глобален проблем и меѓусебната поврзаност во ЕУ, се темите за кои денеска во македонското Собрание ќе се дебатира во рамки на седницата на Парламентарното собрание на Парламентарната димензија на Централно-европската иницијатива (ЦЕИ).
Воведни обраќања на седницата ќе имаат претседателот на Собранието, Трајко Вељаноски, заменикот на генералниот секретар на ЦЕИ, Ерик Церновиц, Јулијана Силјановска, претседателка на ПД на ЦЕИ, и Драганчо Апостоловски, заменик на националниот координатор на ЦЕИ.
„Миграциската криза како глобален проблем и предизвик: колку е реално само регионално решение? (Европа, ЦЕИ и Западен Балкан)“ ќе биде во фокусот на првиот дел од состанокот, за која како говорници се најавени министерот за внатрешни работи на Република Македонија, Оливер Спасовски, и претседателката на собраниската Комисија за европски прашања, Ермира Мехмети.
Министерот за транспорт и врски, Владо Мисајловски, и шефот на резидентната канцеларија на ЕБОР во Република Македонија, Анка Јоана Јонеску, пред присутните ќе зборуваат за „Меѓусебната поврзаност во ЕУ, со посебен контекст на регионот на ЦЕИ“.
Се очекува седницата да заврши со усвојување на финална декларација.
Седницата на Парламентарното собрание на Парламентарната димензија на ЦЕИ се одржува во рамки на македонското претседавање со иницијативата.
