Пет лица загинаа, а 37 се ранети кога руски проектил го погоди централниот плоштад во североисточниот украински град Чернихив, соопшти украинското Министерство за внатрешни работи, а пренесе Ројтерс.
„Луѓето беа на пат кон црквата за да го прослават верскиот празник кога се случи нападот“, соопшти Министерството, додавајќи дека 11 од ранетите се деца.
Украинскиот претседател Володимир Зеленски, потврди нападот се случил на централниот плоштад во Чернихив.
„Руска ракета погоди точно во центарот на градот, во нашиот Чернихив. Плоштадот, политехничкиот универзитет, театарот“, објави тој на Телеграм.
„Обична сабота, која Русија ја претвори во ден на болка и загуба. Има мртви, има повредени“, додаде Зеленски. Тој не го прецизираше бројот на жртвите, пишува Ројтерс.
Вијачеслав Чаус, началникот на регионалната воена управа на Чернихив, претходно напиша дека Русите најверојатно го погодиле центарот на Чернихив со балистичка ракета.
Во краткото видео што ја придружува објавата на Зеленски прикажани се остатоци расфрлани низ плоштадот пред драмскиот театар, а паркираните автомобили се мноху оштетени.
На видеото може накратко да се види и едно тело наведнато во автомобил.
Русија ги напаѓа украинските градови далеку од линијата на фронтот со проектили и беспилотни летала како дел од нејзината целосна инвазија започната во февруари 2022 година.
(Овој текст е ажуриран со информации од украинското Министерство за внатрешни работи во 12:30 часот, 19.08.2023 г.)
