Во организација на „Цивика мобилитас“, денеска во Охрид почна Регионалниот форум за соработка, под мотото „Твој простор, твој глас“.
Граѓани и граѓански организации дискутираат за управување со отпадот, за заштитата на охридското крајбрежје, за учество на младите во носењето политики и за нивната невработеност, за прогласување на Јабланица за национлен парк, за миграциите и слично.
Даниела Стојанова, национален проект-координатор, вели дека целта на овој форум е осмислување и идентификување идеи, кои граѓаните или здруженијата заеднички ќе можат да ги развиваат во меѓусебна соработка.
– Учесниците, претставници на граѓанските организации и граѓани од југозападниот регион, ќе ги посочат проблемите со кои се соочуваат и ќе се обидат да осмислат начин како да си помогнат и како да ги реализираат замислените проекти во иднина – додава Стојанова.
Ова е трет форум од ваков тип што го организира „Цивика мобилитас“. Претходно вакви форуми се одржаа во Скопје и во Куманово.
