На седницата на Комисијата за образование во Собранието денеска, пратениците од владејачката партија, ВМРО-ДПМНЕ, членови на комисијата, изгласаа одлука која само тие знаат што е.
Додека заменичката на координаторот на пратеничката група на СДСМ, Соња Мираковска, процедурално зборуваше на говорница, претседателката на комисијата, Олга Најденовска, читаше одлука од дневниот ред, а пратениците на ВМРО-ДПМНЕ ја слушаа преку слушалки.
Во салата, додека Мираковска зборуваше, пратениците од СДСМ се обидуваа да ја вразумат Најденовска да не предлага одлуки додека пратеник сè уште зборува.
Најденовска неколкупати ја предупреди Мираковска дека времето за изложување ѝ е поминато и оти ѝ го зема зборот, но пратениците од СДСМ тврдеа дека одлуката за ограничување на говорот на пратениците во оваа комисија е неуставна и го прекршува деловникот.
Претходно процедурано зборуваа координаторите на двете политички партии, СДСМ и ВМРО-ДПМНЕ, и меѓусебно се обвинуваа кој го крши Уставот и деловникот на Собранието.
Комисијата за образование денеска расправаше за формирањето на универзитетот „Дамјан Груев“.
