Граѓани и членови на семејствата на загинатите во пожарот во модуларната болница во Тетово што се случи пред две години денеска протестираа во Скопје. Со транспаренти во рацете, денеска побараа правда за случајот, во кој животот го загубија 14 лица на 8 септември 2021 година.
Роднините бараат да се разрешат петмина обвинители, но и бараат судска разрешница и казни за одговорните лица од Министерството за здравство и од компанијата „Брако“. Сметаат дека е неопходно да се преиспита судскиот процес за модуларната болница што заврши во тетовскиот суд, пренесува Portalb.mk.
„Убијци“, „правда“, „чудовишта“, ова беа само дел од повиците на членовите на семејствата и граѓаните, кои денеска маршираа од плоштадот „Скендербег“ до зградата на Обвинителството во центарот на Скопје, за да побараат одговорност за 14-те изгубени животи.
„Довербата во правосудниот систем е нула и сведоци сме на тотална неодговорност со криминалното владеење. Културата на неказнивост метастазираше на сите нивоа на системот и не знаеме која онкологија може да го излечи ракот што ја зафати цела Македонија“, изјави Ибин Емшиу од село Синичане.
Роднините на загинатите бараат да се разрешат обвинителите кои работеа на предметниот предмет, почнувајќи од главниот обвинител Љубомир Јовески, Бесир Алиу, Ханефи Амети, Зорица Павловиќ и Дејан Петрески вклучени, според нив, во криењето на делото.
„Да се отвори судска постапка за причините за пожарот, каде на обвинителна клупа ќе седнат челниците на Министерството за здравство како нарачател (на модуларната болница) и фирмата „Брако“ како победник на тендерот“, е второ барање на членовите на семејството.
Бараат да има и повторно судење и преиспитување на одлуките од тетовскиот суд.
„Доколку нашите барања продолжат да наидуваат на незаинтересираност, ќе бидеме принудени да ја смениме формата на мирниот протест. Нема мир без правда“, рече Емшиу, кој зборуваше во името на семејствата на жртвите.
