Основното јавно обвинителство за гонење организиран криминал и корупција постапувајќи по кривична пријава од МВР, донесе наредба за спроведување истражна постапка против едно лице поради илегален транспорт на мигранти.
„Осомничениот пред два дена во раните утрински часови го паркирал своето товарно моторно возило – камион марка „мерцедес“, на паркиралиште во близина на бензинската пумпа „Окта“ на граничниот премин Богородица. Камионот бил погодно направен за криумчарење мигранти, кои преку специјален отвор што се наоѓал на подот на шасијата, незабележано влегувале од под паркираното возило во товарниот простор. На ваков начин, осомничениот со претходно добро организирање, прифатил 69 мигранти од кои 13 биле малолетни лица“, велат од Основното јавно обвинителство.
Основниот суд Скопје 1 на осомничениот му определил мерка притвор во траење од 30 дена.