Караванот на граѓанската акција „Ние одлучуваме!“ денеска одржа перформанс во центарот на Прилеп.
Активистите од црно-жолтиот камион емитуваа аудиопораки на акцијата, а впечатливоста на перформансот беше засилена со пиротехнички средства, банери и со знамиња.
„Повеќе од дваесетина активисти разговараа со граѓаните на Прилеп за клучните теми и проблеми со кои се оптоварени граѓаните на Прилеп и на Македонија. Прилепчани бараат подобро здравство, посочувајќи го Прилеп како еден од градовите со голема смртност на родилки и со недостиг од лекарски кадар и од адекватна опрема во сите здравствени установи. Иселувањето на младите како директен резултат на сиромаштијата и на безработицата што владеат во Прилеп, се клучните проблеми за кои прилепчани бараат промени“, велат од „Ние одлучуваме“.
