Пратениците од СДСМ најдоцна до среда, официјално ќе станат членови на собраниските комисии. Пратеничката група на СДСМ вчера ги поднела предлозите за претседатели и за членови за комисии, но сè уште не можат да почнат да работат.
Зоран Илиоски од ВМРО-ДПМНЕ, претседател на Комисијата за избори и за именувања, вели дека треба да се направат неколку усогласувања, па потоа да се гласа.
– Пратеничката група на СДСМ ни ги достави предлозите за претседатели и за членови на комисиите. Тие добија податоци во која комисија колку слободни места има и ние сега мора да ги усогласиме податоците. Ако не стигнеме оваа недела, седница на Комисијата за избори и за именувања ќе свикаме најдоцна до среда идната недела и ќе ги изгласаме пратениците од СДСМ за членови на комисиите – вели Илиоски.