Собранието на Република Македонија денеска треба да ја одржи 31. седница, а на дневен ред се предлозите за изменување и за дополнување на Законот за заштита на децата, Законот за хартии од вредност, Законот за банки, Законот за парнична постапка, Законот за народен правобранител и на Законот за земојделство и рурален развој, сите во прво читање.
На оваа седница на дневен ред се и повеќе предлог-закони за изменување и за дополнување на закони за задолжување на Република Македонија кај Европската банка за обнова и развој по Договорот за заем за проектот за рехабилитација на источниот дел на железничката пруга на Коридорот 8 за делниците Куманово – Бељаковце и Бељаковце – Крива Паланка, за заем за проектот за набавка за нови влечни и влечени средства во МЖ „Транспорт“, за заем за финансирањње на програмата за национални патишта меѓу ЕБОР и ЈП за државни патишта и за заем за финансирање на проектот за рехабилитација на магистрални и регионални патишта меѓу Меѓународната банка за обнова и развој – Светска банка и ЈП за државни патишта.
Во второ читање на оваа седница се предлог-законот за изменување и за дополнување на Законот за заштита на децата, дополнетите предлог-закони за изменување и за дополнување на Законот за производи за заштита на растенијата, Законот за здравствена заштита, Законот за квалитет на амбиенталниот воздух, Законот за снабдување со вода за пиење и одведување урбани отпадни води, Законот за облигационите и стварноправните односи во воздушниот сообраќај, како и пакетот закони во образованието.
Пред пратениците се и повеќе барања на автентични толкувања на членови од закони.