Повеќе од 3.000 битолчани тргнаа на пат за Скопје да го поддржат митингот на опозицијата. Во долгата колона од Битола, се 19 автобуси, 14 минибуси и 300 автомобили со битолчани кои ќе го поддржат митингот во Скопје.
Ниту еден од битолските превозници не се нафати да вози за опозицијата. Под изговор дека се на тешка мака и силни притисоци, синоќа откажал и последниот автобуски превозник. Така, ноќеска битолските социјалдемократи едвај успеале да ангажираат 19 автобиси од Тетово, Кичево и од Неготино.
Пратеникот и лидер на битолските социјалдемократи, Васко Ковачевски, за „Мета“ потврдува дека повеќе од 3.000 битолчани се на пат за Скопје , колоната е пред Плетвар и засега нема проблеми.
– И покрај сите маки и тешкотии со кои моравме да се соочиме овие денови при организацијата, за битолчани да ги однесеме на митингот во Скопје, сепак успеавме. Ова покажува дека Битола има опозициско расположение и граѓаните се силно мотивирани да ѝ кажат „не“ на оваа Влада – рече Ковачевски.
Од Прилеп на денешниот митинг во Скопје се очекува да пристигнат повеќе од 3.000 граѓани. Тие ќе допатуваат со повеќе од 300 автомобили, а за 1.500 луѓе е организиран превоз со автобуси и со комбиња. Голем е и бројот на прилепчани кои самоинцијативно, без организиран превоз, ќе дојдат или веќе пристигнале во Скопје да го поддржат митингот на опозицијата.