Од повеќе локации во Штип тргна конвојот со неколку стотина приватни возила на протестот во Скопје. Услугите ги откажаа дел од превозниците, на кои им било платено. Од планираните 25 автобуси, останаа десет, на кои претпладнето се качија граѓани и членови на опозициските партии.
Претседателот на штипската организација на СДСМ, Владимир Милошев, рече дека со многу проблеми се одивала организацијата, но решени се да отпатуваат и да бидат дел од попладневниот протест во центарот на Скопје.
Според процените, од Штип тргнале повеќе од 1.500 луѓе.
Масовност очекуваат и од владејачката ВМРО-ДПМНЕ. Општинскиот лидер Никола Мицевски на прес-конференција рече дека собирот в понеделник ќе биде „моќен народен одговор на сите сценарија за дестабилизација на државата и истовремено ќе биде повик за стабилна и силна Македонија“.