Министрите за надворешни работи на Република Северна Македонија и Република Бугарија, Бујар Османи и Теодора Генчовска денес по одржувањето на вториот состанок на Заедничката меѓувладина комисија со Бугарија го потпишаа вториот билатерален протокол за исполнување на Договорот за добрососедство и пријателство од 2017.
Протоколот е дел од преговарачката рамка за почеток на пристапните преговори на Македонија со ЕУ, истиот го отвора патот за одржување на првата меѓувладина политичка конференција. Министерството за надворешни работи најави дека протоколот ќе биде достапен за јавноста по потпишувањето.
„За нас е историска можност што после 17 години кандидатски статус РСМ добива можност да ги почне преговорите уште утре, задутре со ЕУ што почнува последната фаза од нашето пристапување кон ЕУ. Се надеваме и овој билатерален процес на соработка со Република Бугарија, меѓутоа и другиот пат на пристапни преговори со ЕУ ќе овозможат поблиска соработка меѓу двете држави“, изјави Османи и додаде дека се очекува поддршката од страна на Бугарија на овој пат, кој како што рече, почнува на пристапни преговори на членство во ЕУ.
Генчовска порача дека Бугарија најсилно ја поддржува интеграцијата на Македонија и Албанија во Европската Унија. Според неа, сега останува да се исполни договореното за што, како што изјави, ќе биде потребен сериозен ангажман од двете држави.
Kако дел од Владината делегација на состанокот присуствуваа и Вицепремиерот за европски прашања Бојан Маричиќ, министерката за култура Бисера Костадиновска Стојчевска, министерот за економија Крешник Бектеши, како и министерот за транспорт и врски, Благој Бочварски.
Маричиќ изјави дека со потпишувањето на Протоколот, Договорот за пријателство и добрососедство веќе добива нов дух, а Бугарија станува наш партнер и сојузник на европскиот пат, што било потврдено и на состанокот на меѓувладината комисија дека со овој чин ја зајакнуваме меѓусебната доверба и улогата на соработката.
„Секторските групи продолжуваат да работат и во следниот период ќе се фокусираат на заедничко делување во менаџирањето и надминувањето на кризите со кои се соочуваме. Имаме здрава и цврста основа да го продолжиме дијалогот во позитивна атмосфера, достоинствено чекорејќи кон ЕУ“ истакна вицепремиерот Маричиќ на состанокот.
Со 68 гласа за, пратениците вчера ги изгласаа предлог-заклучоците за пристапните преговори со Европската Унија, предложени од страна на француското Претседателство со Советот на Европа.
Владата вчера ги разгледа и усвои заклучоците кои ги изгласа Собранието и врз основа на тие заклучоци донесе одлука за одобрување на предлогот на француското претседателство од 30 јуни.
Владата го одобри францускиот предлог за почеток на преговорите со ЕУ
