На Пописот што се спроведе минатата година се попишани вкупно 2.097.319 лица, од кои 1.836.713 се резидентно население што живее во Македонија, додека 260.606 се нерезидентно население, изјави на денешната презентација на резултатите директорот на Државниот завод за статистика, Апостол Симовски.
Од нив, во македонскиот главен град Скопје живеат 526.502 лица, односно бројот на населението е зголемен за 3,9 отсто во споредба со 2002 година, додека домаќинства во Скопје има 171.171 и се за 16,8 отсто повеќе од 2002 година. Во однос на целата земја, бројот на домаќинства изнесува 598.632, додека просечниот број на членови на домаќинствата е 3,06.
Од вкупниот број на резидентното население, 925.626 лица се жени (50,4 отсто), додека 911.087 лица се мажи (49,6 отсто).
Според бројот на жители најмала е општината Зрновци со 2.086 жители, а најголема е општината Куманово со 98.104 жители. Густината на населеност во земјава изнесува 72.2 на км2.
Во земјава има 207 празни населени места, додека просечната возраст на населението изнесува 40.08 години.
Куриозитет е што во Северна Македонија е попишанo 51 лицe на возраст над 100 години. Бројот на странци времено присутни во Република Северна Македонија во период помалку од 12 месеци, како дел од вкупното нерезидентно население, изнесува 1.674 лица.
