Основното јавно обвинителство Струмица донело наредба за спроведување истражна постапка против мајка осомничена за кривичното дело Запуштање и малтретирање на дете.
Осомничената грубо ја запоставила својата родителска должност за грижа и воспитување кон својата четиригодишна ќерка. Таа го запуштила своето дете и дозволила ќерката да се оддаде на питачење. Поради тоа настапило тешко нарушување на здравјето на детето. Тоа е во тешка здравствена состојба – на 17 јануари било примено во ЈЗУ Општа болница Струмица, а потоа хоспитализирано на Клиниката за детски болести во Скопје, соопшти обвинителството.
Надлежниот јавен обвинител продолжува да постапува и го очекува наодот од Институтот за судска медицина во поглед на причините за настанатите повреди кај девојчето. По барање на јавниот обвинител, Центарот за социјални работи постапи согласно своите надлежности за обезбедување заштита на другите три деца од семејството.
