Од денеска, заинтересираните кандидати од земјата и од светот можат да се пријавуваат на конкурсот за учество на Меѓународната школа за млади лидери, што под покровителство на претседателот на Република Македонија, Ѓорге Иванов, ќе се одржи од 16 до 28 август во Охрид.
Годинава школата ќе биде под мотото „Инспирирање и развој на исклучителни млади лидери“. Програмата е наменета за млади луѓе со завршено високо образование, кои имаат желба преку нивните лидерски вештини да придонесат за позитивен развој на општеството и на околината во која живеат и работат. Програмата ќе опфати и предавања и практични вежби со еминентни предавачи од земјава и од странство.
Наставата ќе се одвива на македонски и на англиски јазик.
Комплетната докумантација на лицата што сакаат да учествуваат треба да се испрати до 15 јуни на адресата на Кабинетот на Претседателот на Република Македонија.