Германскиот министер за одбрана Борис Писториус предупреди дека војната во Украина може да се прошири, пишува германската новинска агенција ДПА.
„Речиси секој ден слушаме закани од Кремљ“, изјави тој денеска за весникот „Тагесшпигел“.
Русија за последен пат им се закани на балтичките држави, изјави Писториус во интервјуто по повод една година од преземањето на функцијата. „Мора да сметаме, додаде тој, „дека Владимир Путин еден ден ќе нападне дури и земја на НАТО“.
Во моментов, сепак, министерот не смета дека таков напад е веројатен. Експертите пресметаа дека тоа би било можно за пет до осум години.
Со своето предупредување, Писториус, според неговите зборови, сака да го „разбуди“ германското општество и да укаже дека германската армија мора да биде „штаб за војна“.
Писториус веќе предложи повторно воведување на воен рок, со одредени измени. Тој очекува Министерството да го официјализира предлогот до април.
Тој зборуваше и за можноста луѓе кои немаат германско државјанство да служат воен рок.
„Нашите вооружени сили нема да бидат првите во Европа што ќе го направат тоа“, рече Писториус. Во Германија има луѓе кои живеат таму веќе од втората или третата генерација, но сè уште немаат државјанство.
Писториус ги отфрли повиците Германија да испрати поголема воена помош за Украина. Тој посочи дека мора да се води сметка за Бундесверот, германската армија, која не смее да остане „без одбрана“.
Тој потсети дека Германија досега испратила повеќе оружје во Украина од која било друга членка на Европската унија и ги повика европските партнери да направат повеќе.
„На сите треба да им биде јасно – доколку Путин победи во оваа војна и ја окупира Украина, секако дека опасноста за областа на алијансата (НАТО) ќе се зголеми“, заклучи Писториус.
