Министерката за одбрана Славјанка Петровска за време на работната посета на Соединетите Американски Држави во амбасадата во Вашингтон, порача дека нашата држава денеска треба да го обезбеди својот европски пат и се заблагодари за поддршката од нашиот стратешки партнер – САД, во развојот на демократијата и зацврстувањето на мирот.
Таа се обрати на свечениот прием во чест на Денот на независноста на Република Северна Македонија и Денот на Армијата.
Министерката Петровска порача дека во трите децении независност беа испишани многу страници македонска историја, исполнети со предизвици и тешки одлуки.
„Во раните деведесетти мојата земја се соочи со голем предизвик, да прогласи независност во мир избегнувајќи војна и страдања. Денес, истакнувајќи го европскиот концепт на единство во разликите работиме на уставни измени за да го обезбедиме нашиот пат кон Европската унија“, рече министерката.
На приемот присуствуваше Габриел Ескобар, заменик-помошник државен секретар на САД и специјален претставник за Западен Балкан, поранешниот амбасадор на САД во државава, Џес Бејли, поранешни одбранбени аташеи и претставници на американската амбасада во Скопје и Канцеларијата за одбранбена соработка со САД, како и претставници на академската заедница.
